Heb 5 | ASO | STEP | Ido' ne'mino geni lebeleli initekumu' O'moso lo-emelone' nene eveneto' medelo mino O'moso inite' lehize-daa' ive naba'mi monovo ti' lo neingumu' nene gelo ma ne'mine ha olosune. Ne'mino neive: Eveneto' medeli mini O'moso inite' lehizi-daa' ave muki' ngele'mizi milika' milika' iga' nani' nene sipisipi nevo'mine inite' lihimete apase-ledelive li O'moso imilisa di ani' nene ngibili O'moso imani' inite' ato ato' muki' nesi oloku' gizika' gizika' igi minilisa evene' lelikumu' ve li O'mosola gono di hizi ele' i-lidilizave minilizave lo O'moso'mo lido' igi evene' engikuti' nene ma ngele'mizi milaa' nave.

Hebrews 5

1 Ido' ne'mino geni lebeleli initekumu' O'moso lo-emelone' nene eveneto' medelo mino O'moso inite' lehize-daa' ive naba'mi monovo ti' lo neingumu' nene gelo ma ne'mine ha olosune. Ne'mino neive: Eveneto' medeli mini O'moso inite' lehizi-daa' ave muki' ngele'mizi milika' milika' iga' nani' nene sipisipi nevo'mine inite' lihimete apase-ledelive li O'moso imilisa di ani' nene ngibili O'moso imani' inite' ato ato' muki' nesi oloku' gizika' gizika' igi minilisa evene' lelikumu' ve li O'mosola gono di hizi ele' i-lidilizave minilizave lo O'moso'mo lido' igi evene' engikuti' nene ma ngele'mizi milaa' nave. 2 Ido' a'mine eveneto' medeli mini O'moso inite' lehizi-daa' ave naba nene haza evene' mini inginesi nene evene' muki' amuzote nomine' mino aka laminetoti' zovo' izo vaa' noune' ne'mine nene ha ilizado' o neine' nenako nemu' nene mono' gili lamine' ami zovo' izi vaa' nani' ne'mino lazasi zovo' izo vunidine li ne'mine ani' aleve nene mulumo'ine gili hongu monovo ngelebizilizado' o neive. 3 Ido' a'mine eveneto' medeli mini O'moso inite' lehizi-daa' ave nabasi nene amuzo'ine nomine' mini zovo' ha izi vilizado' i nizani' nenako nemu' evenekumu' nene lihime'ine apase-ngedelive li sipisipi nevo'mine inite' ngibili oloku' gizi O'moso imilizani' ne'mine igi angise'inemukisi ma imilizani' o neive. 4 A'mine eveneto' medelo mino O'moso inite' lehize-daa' ive naba'mi gono nene dizosa neive. Ido' a'mine gono dalisa nene ve malite engi' lu'nido' di mili ma disa'mave. O'moso asi've nene Mose' uvoloho Aloni'ni nene do ote-davo ne'mine gono dani' ma'mine ogo evene' ma do ote-ngedavo a'mine gono nene daa' nave. 5 Ido' Kilisito' nene a'mine'mine ogo ei' gala gilido' do molo ei' oko'no do hozi lo eveneto' medelo mino O'moso inite' lehize-daa' ive naba lolo' amine'. Asi O'moso ne'mo ele'mize nomolo ti' lo lo-dine' ve:

Idise naza gei' maho lolo' ogo neni' gipe'ne gei' nene nane lo
do ote-giduvoni' ve.
6 Ido' mono' gamazi gohi mauti' Kilisito' nene Abalahamu'ni no'noho' ize-dive Melekisedeki' gono daa' ine' ne'mino a'mido' medelo do mino eveneto' medelo mino O'moso inite' lehize-daa' ive minelive lo Kilisito'nimu' ti' lo line':

O'moso neni' nimani' inite' nene Melekisedeki' gono daa' ine' monovolo' ogo
eveneto' medelo mino inite' lehize-nedaa' anive
minevo' minevo' ogo minelesane.
7 Izesu' aza misubouko ve lolo' ogo minine' gameneu' nene aza helaa' akalo' novinguti' do ti'ne-do do u' izeli amuzo'vesi minive O'mosola nene vise naba' naba lo ido' O'mosola loo veleti' ive novozo limine'. Ne'mine ogavo aza oko'no do'mo lemo gelekele' o-nedaa' ingumu' ve lo O'moso'mo gele imine'. 8 Aza nene O'moso'mi gipele minine'za mulumo alumo giline' ne'mo nene O'moso gelekele' o-daa' monovomu' nene gele ngolo' lo giline'. 9 Ido' ne'mino gele ngolo' lo gilidi'mo eze nene gono dalido' lisihe' gehepeve ogo mino gelekele' o-daa' unive mukikumu' nene minevo' minevo' oloningumu' ve lo mudise do lu' izaa' ne'mi meleho nene aza lolo' ogavosa 10 O'moso'mo gaza neni' nimani' inite' nene Melekisedeki' gono daa' ine' monovolo' ogo eveneto' medelo mino inite' lehize-nedaa' anive naba minelesane lo ele'mize molani' ve.

Mono' Hulikelizave Lo Ga'ine Do Gizine' Gamazi

11 Ido' a'minemu' gamazi lo-lengemeloni' nene vai' goloso neine'za gatine gohi duu lo vivo nizani' ne'mo nene lo ngolo' lo lo-lengemelesa ge'nebe olosuve. 12 Ido' ge'nebe oloni' nene lingine Kilisito' evenele lili' igi gamene ha'na minani' nenako idise mene evene' ma mono' monovo apizi ngimilizado' i minilizanako ne'mine ami ve malite O'moso'mi gamazi nili-lingimavo gohi api' igi bina gili'mi gili'mi dizi alizado' mini mili mini mono' gamazi amuzo malehe ma gilami izipe amine naa' nani' ne'mine lapa nomine' gamazi neevo' nene gililizado' i nizani' ne'mo nene ge'nebe olosuve. 13 Ee, ingine amine naa' nave muki' nene ha izipe ngomo ne'mine nene nizanako ne'mo nene monovo lisiheli'mi gamazi've nene ningi di kegesami ladenivo' igi minaa' nave. 14 Ne neiha lute'mi amuzo malehe noso' nite've nalizani' nene lute gate do lamine' olone li di ningi' ningi' igi monovo lisihekisi golososi ningi di kegesisa monoku' lodive igi nizave engikovo' nene amuzo malehe noso' nite' ne'mine nene ha nalisave.